Ten Hag segir leik­menn í dag of við­kvæma

Ten Hag var rekinn frá United í október, þremur mánuðum eftir að hann skrifaði undir tveggja ára samning við félagið. Ten Hag stýrði United í rúm tvö ár og undir hans stjórn vann liðið ensku bikarkeppnina og deildabikarinn.

Í viðtali við SEG Stories ræddi Ten Hag um breytinguna sem hefur orðið á leikmönnum frá því hann var sjálfur að spila.

„Þessi kynslóð á vanalega erfitt með að takast á við gagnrýni. Hún nær til þeirra,“ sagði Hollendingurinn.

„Kynslóðin mín hafði miklu þykkari skráp. Þú gast verið ákveðnari. Þjálfarar nálguðust mig á beinskeyttari hátt. Ef ég myndi gera það við þennan hóp myndi það letja þá. Þeim finnst það móðgandi.“

Þegar Ten Hag stýrði United lenti hann meðal annars upp á kant við Cristiano Ronaldo og Jadon Sancho.

Ten Hag, sem stýrði Ajax áður en hann fór til United, kveðst ekki ætla að taka að sér nýtt starf fyrr en á næsta tímabili.