Strákarnir sem mæta Grikkjum í dag: Margir aðal­leikarar utan hóps

Fyrirliðinn Aron Pálmarsson var valinn í æfingahópinn fyrir leikina við Grikki en á við meiðsli að stríða og verður ekki með í dag.

Sjö aðrir leikmenn sem voru með á HM í janúar eru heldur ekki með núna, þeir Viktor Gísli Hallgrímsson, Gísli Þorgeir Kristjánsson, Elvar Örn Jónsson, Viggó Kristjánsson, Bjarki Már Elísson, Teitur Örn Einarsson og Sveinn Jóhannsson. Ómar Ingi Magnússon og Arnar Freyr Arnarsson eru ekki heldur með. Leikurinn fer fram í Chalkida í höll sem Snorri Steinn Guðjónsson landsliðsþjálfari segir að standist varla margar kröfur.

Björgvin Páll Gústavsson er langreynslumesti maðurinn í hópnum í dag, með 281 landsleik, en hann deilir markvarðarstöðunni með nýliðanum Ísaki Steinssyni sem er aðeins 19 ára, eða tuttugu árum yngri en Björgvin.

Á eftir Björgvini eru Ýmir Örn Gíslason (100 leikir), Janus Daði Smárason (94 leikir) og Sigvaldi Björn Guðjónsson (83 leikir) með flesta landsleiki en í hópnum eru fjórir leikmenn sem leikið hafa minna en fjóra landsleiki hver.

Leikur Íslands og Grikklands hefst klukkan 17 í dag og er í beinni textalýsingu á Vísi en bein útsending er á RÚV.

• Markverðir:
• Ísak Steinsson, Drammen (0/0)
• Björgvin Páll Gústavsson, Valur (281/25)

• Aðrir leikmenn:
• Andri Rúnarsson, Leipzig (2/0)
• Arnór Snær Óskarsson, Kolstad (2/0)
• Benedikt Gunnar Óskarsson, Kolstad (3/0)
• Einar Þorsteinn Ólafsson, Fredericia HK (19/6)
• Elliði Snær Viðarsson, Vfl Gummersbach (58/124)
• Haukur Þrastarson, Dinamo Búkarest (41/56)
• Janus Daði Smárason, Pick Szeged (94/164)
• Kristján Örn Kristjánsson, Skanderborg (33/61)
• Óðinn Þór Ríkharðsson, Kadetten Schaffhausen (50/147)
• Orri Freyr Þorkelsson, Sporting (24/74)
• Sigvaldi Björn Guðjónsson, Kolstad (83/225)
• Stiven Tobar Valencia, Benfica (18/18)
• Þorsteinn Leó Gunnarsson, FC Porto (13/19)
• Ýmir Örn Gíslason, Göppingen (100/44)