„Ég vissi það þó að innkoman yrði að vera meiri en út­gjöldin“

Kaup Loftleiða og Flugfélags Íslands á stórum millilandaflugvélum skömmu eftir stríð urðu til þess að þau hófu útrás á erlenda markaði með leiguflugi víða um heim. Loftleiðir flugu mikið frá Evrópu til Suður-Ameríku.

„Með innflytjendur til Suður-Ameríku, sérstaklega frá Ítalíu. Komu heim með banana, sem sáust ekki á borðum hér daglega,“ segir Pétur P. Johnson, sem þekkir flugsögu Íslendinga betur en flestir aðrir.

Pétur segir þetta hafa verið á árunum 1947 til 1949. Þá hafi Íslendingar verið komnir út á alþjóðlegan flugmarkað.

Stofnun Cargolux í Lúxemborg var ein stærsta útrásin. Air Viking, sem Guðni Þórðarson í Ferðaskrifstofunni Sunnu stofnaði, varð fyrsta íslenska flugfélagið til að hefja pílagrímaflug árið 1975. Arnarflug tók svo við af Air Viking og varð umfangsmikið í leiguflugi, sömuleiðis Íslandsflug, sem sameinaðist svo Air Atlanta.

Á flugvellinum í Liege í Belgíu sjáum við Atlanta-júmbóþotur í röðum. Þar hittum við íslenska flugvirkja að sinna hreyfli Boeing 747. Þegar við spyrjum hvort þeir ferðist víða um heim vegna starfsins svarar Magni Róbertsson:

„Á morgun fer ég til Afríku. Ég er að fara til Nairobi í gegnum Lagos, Bangui, Entebbe. Þannig að það er langt flug á morgun.“

-Manni finnst dálítið magnað hvað íslensk lítil þjóð er í mikilli flugvélaútgerð. Þegar þið eruð að flækjast um heiminn, finnið þið dálítið til ykkar að vera Íslendingar?

„Ja, maður hittir alltaf Íslendinga einhversstaðar í heiminum. Það er alveg ótrúlegt. Þeir eru allsstaðar í flugi,“ svarar Magni, flugvirki hjá Air Atlanta.

Það má vel halda því fram að viðskiptasaga Íslendinga og Air Atlanta við Saudia-flugfélagið eigi sér hálfrar aldar rætur því hægri hönd Guðna í Sunnu í Air Viking hét nefnilega Arngrímur Jóhannsson, sá sem síðar stofnaði Air Atlanta.

„Það var nú verið að gera grín að mér einhverntímann þegar ég var spurður að því hvort ég væri eitthvað menntaður í viðskiptum. Ég sagði nei.

Fréttamaðurinn spurði: Er þetta þá bara brjóstvitið?

Ég hélt það, - það væri bara brjóstvitið.

En ég vissi það þó að innkoman yrði að vera meiri heldur en útgjöldin. Og það var hlegið mikið að þessu.

En ég held að þetta standist ennþá,“ segir Arngrímur Jóhannsson, stofnandi Air Atlanta.

Fjallað er um alþjóðaútrás Íslendinga í fluginu í þessum sjöunda þætti Flugþjóðarinnar, sem um leið er fyrsti þáttur í seríu númer tvö. Í næsta þætti þriðjudagskvöldið 25. mars verður fjallað um sögu Boeing 757-þotunnar í rekstri Icelandair.

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvenær sem er. Hér má sjá kynningarstiklu fyrir þáttaröðina: