Tekur við sem verk­efna­stjóri dag­skrár­gerðar í Hörpu

Í tilkynningu segir að Elísabet Indra hafi verið valin úr hópi um sextíu umsækjenda um starfið sem feli í sér yfirumsjón með viðburðum og fjölskyldudagskrá á vegum Hörpu auk helstu samstarfsverkefna og ókeypis tónlistaviðburða í opnum rýmum hússins.

„Elísabet Indra hefur margþætta reynslu úr menningarlífinu en hún hefur starfað við verkefna- og viðburðastjórnun á sviði menningarmála hjá Kópavogsbæ, Listaháskóla Íslands, Mengi, Listahátíð í Reykjavík og Reykjavík Midsummer Music. Hún starfaði um árabil sem dagskrárgerðarmaður hjá Rás 1 þar sem hún stýrði menningarþáttum af ólíku tagi. Hún hefur tekið að sér fjölbreytt verkefni á sviði tónlistarumfjöllunar og miðlunar, meðal annars fyrir Sinfóníuhljómsveit Íslands og gegnt trúnaðarstörfum fyrir STEF, Sumartónleika í Skálholti, Tónskáldafélag Íslands, RÚV og Hörpu.

Elísabet Indra er með MA í tónlistarfræðum frá Goldsmiths College í London, BA í íslensku frá HÍ og fiðlukennarapróf frá Tónlistarskólanum í Reykjavík. Hún hefur lokið diplómu í heimilda- og fléttuþáttagerð fyrir útvarp og stundað nám í menningarmiðlun við HÍ. Hún hefur starfað sem viðburða- og verkefnastjóri menningarmála hjá Kópavogsbæ frá árinu 2020,“ segir í tilkynningunni.