Laxadauðinn í Berufirði komin á borð lög­reglu

Þar segir að meint brot varði útsetningu seiða í of kaldan sjó með þeim afleiðingum að þau drápust í stórum stíl. Matvælastofnun telur meint brot varða við ákveðin ákvæði dýravelferðarlaga. Stofnunin metur brotin alvarleg og segist þar af leiðandi hafa óskað eftir lögreglurannsókn.

Ekki kemur fram í tilkynningu MAST hvaða fyrirtæki um ræði. Nýverið var greint frá stórfelldum laxadauða í Berufirði þar sem fiskeldisfyrirtækið Kaldvík er með aðstöðu. Fyrirtækið þurfti að farga tugþúsundum eldislaxa sem voru ýmist dauðir vegna vetrarsára eða áttu sér enga lífsvon vegna þess hversu illa leiknir þeir voru. Hjá Kaldvík drápust í nóvember 470 þúsund fiskar, í desember 758 þúsund og í janúar 381 þúsund fiskar.

Karl Steinar Óskarsson deildarstjóri fiskeldisdeildar hjá MAST kom að ástandsskoðun hjá Kaldvík í febrúar. Í skýrslu MAST kom fram að mikið hefði verið um sveimara og særða fiska í öllum kvíum í Svarthamarsvík en svokallaðir sveimarar eru hálfdauðir fiskar sem líða um og bíða dauða síns.

Karl Steinar sagði í samtali við Vísi fyrir tveimur vikum að meginorsökin væri snögg lækkun hitastigs sjávar úr tveimur gráðum niður í núll gráður. Undirliggjandi bakteríur geri fiskinn veikan fyrir.

„Þegar sjórinn kólnar svona bratt getur ástandið versnað mjög hratt,“ sagði Karl Steinar. 

Lögreglan á Austurlandi hefur málið til meðferðar og veitir Matvælastofnun ekki frekari upplýsingar um málið að sinni.