Bíó Para­dís valið eitt af 21 svölustu kvik­mynda­húsum heims

Í umfjöllun Variety segir að það séu margar leiðir til að meta það hvort að kvikmyndahús sé gott, til dæmis arkitektúrinn og sögulegt gildi hússins. Það séu þó alls ekki einu þættirnir sem sé hægt að líta til og til að geta valið mest svölustu kvikmyndahúsin hafi þau einnig litið til tækninnar sem er notuð í mynd og hljóði, til dagskrár og umgjarðar kvikmyndahússins og til aðstöðunnar sjálfrar fyrir gesti.

Á listanum er aðeins að finna kvikmyndahús sem eru aðgengileg almenningi, sem sýna aðallega kvikmyndir og eru opin allan ársins hring á sama staðnum. Á listanum, auk Bíó Paradísar, er að finna kvikmyndahús á Indlandi, í Bretlandi, Suður-Kóreu, Frakklandi, Hollandi, Grikklandi, Dubai og víðar

Mikill heiður

„Þetta kom algjörlega að óvörum, og það var engin önnur en Mimi Plauché, listrænn stjórnandi Chicago Film Festival, sem sendi mér ótrúlega flott og einlæg skilaboð þar sem hún óskaði okkur til hamingju með þennan gríðarlega heiður. Þannig við komumst að þessu frá erlendum fagaðila sem er í raun mjög persónuleg viðurkenning frá virtri fagmanneskju í kvikmyndahátíðabransanum í Bandaríkjunum – og það segir sitt,“ segir Ása Baldursdóttir dagskrárstjóri Bíó Paradís.

Um Bíó Paradís segir í grein Variety að ytra útlit hússins segi ekki mikið um innihald þess. Það sé aðeins fimmtán ára gamalt en að kvikmyndahúsið hafi þegar þurft að berjast við yfirvofandi lokun og komist hjá henni. Þá er tekið fram að kvikmyndahúsið sé það eina í miðborg bæjarins og eina kvikmyndahúsið þar sem hægt sé að sjá listrænar myndir og erlendar, það er ekki amerískar.

„Anddyrið er algjörlega þakið þeirra eigin túlkunum á kvikmyndaplakötum sem eru gerð af íslenskum listamönnum. Allt frá Shining að Enter de Dragon og Omen fær sitt eigið listaverk,“ segir í lýsingunni.

Þá er tekið fram að hægt sé að leigja forsalinn fyrir veislur og að þegar blaðamaður blaðsins hafi litið við hafi starfsfólk verið að undirbúa barnaafmæli.

Stórkostlegar fréttir

Ása segir þetta skipa kvikmyndahúsinu í hóp bestu og áhrifamestu listrænna kvikmyndahúsa um allan heim.

„Þetta eru stórkostlegar fréttir og hefur greinarhöfundur sérstakt orð á því að galleríið sé þakið endurgerðum kvikmyndaplakötum eftir innlenda listamenn, en hugmyndina fékk Hugleikur Dagsson sem er einn af dagskrárstjórum Svartra Sunnudaga- dagskrárlið í bíóinu þar sem költ og klassík ræður ríkjum.“

Hún segir í stórkostlegt að Bíó Paradís sé stillt upp við hlið kvikmyndahúsa eins og Electric í London Nitehawk í Brookly, TCL Chinese Theatre á Hollywood Boulevard og Egyptian Theatre í LA og Eden kvikmyndahúsinu þeirra Lumière-bræðra.“

„Það er fæðingarstaður kvikmyndanna sjálfra. Þetta er í raun alveg stórkostleg upptalning í grein Variety. Þetta er ekki bara viðurkenning fyrir Bíó Paradís – þetta er viðurkenning á íslenskri kvikmyndamenningu og því sem við höfum staðið fyrir í gegnum árin. Þetta er alþjóðleg staðfesting á því að við erum að gera eitthvað rétt – og við erum ekki hætt,“ segir Ása.

Bíó Paradís opnaði árið 2010 en í húsnæðinu var fyrir það rekið kvikmyndahúsið Regnboginn.