Enginn komið að fleiri mörkum á 38 leikja tíma­bili en Salah

Á 18. mínútu leiksins á Anfield sendi Salah boltann fyrir á Díaz sem skoraði með skoti af stuttu færi.

Þetta var átjánda stoðsending Salahs í ensku úrvalsdeildinni í vetur en auk þess hefur hann skorað 27 mörk.

Egyptinn hefur því komið með beinum hætti að 45 mörkum í ensku úrvalsdeildinni í vetur. Það er met hjá einum leikmanni á 38 leikja tímabili í ensku úrvalsdeildinni. Fyrir leikinn deildu Erling Haaland og Thierry Henry metinu með Salah sem hefur nú slegið það.

Salah á eflaust enn eftir að bæta við þessa tölfræði því Liverpool á enn eftir að leika sex deildarleiki á tímabilinu auk þess sem leikurinn gegn West Ham stendur enn yfir. Staðan í hálfleik er 1-0, Liverpool í vil.

Salah skrifaði undir nýjan tveggja ára samning við Liverpool á föstudaginn. Gamli samningurinn hans átti að renna út í sumar og óvíst var hvort Salah yrði áfram hjá Liverpool.

Ef Liverpool vinnur West Ham nær liðið þrettán stiga forskoti á Arsenal á toppi ensku úrvalsdeildarinnar.