Tíma­bilið gæti verið búið hjá Marcus Rashford

Crystal Palace vann leikinn 3-0 og mætir annað hvort Manchester City og Nottingham Forest í úrslitaleiknum.

Það vakti athygli að Rashford var ekki í byrjunarliði Aston Villa eftir að hafa farið mikinn síðan hann kom á láni frá Manchester United. Unai Emery hafði skýringu á því eftir leik.

Rashford missti af leiknum eftir að hafa meiðst á æfingu í vikunni fyrir leikinn. Svo gæti farið að hann missi af restinni af tímabilinu sem væru slæmar fréttir fyrir Villa menn í baráttunni um sæti í Meistaradeildinni.

„Hann er meiddur,“ sagði Unai Emery.

„Hann meiddist á æfingu í vikunni og við sendum hann í myndatöku á föstudaginn. Þetta er tognun aftan í læri. Við munum skoða stöðuna á honum fyrir hvern leik en hann er meiddur og það eru líklega einhverjar vikur í það að hann verði klár,“ sagði Emery.

Rashford hefur spilað vel með Aston Villa eftir að hann kom þangað úr frystikistunni á Old Trafford. Í sautján leikjum sínum með Aston Villa hefur hann boðið upp á fjögur mörk og sex stoðsendingar.

Rashford var þó ekki meiddari en það en að hann mætti á boxbardaga á Tottenham leikvanginum í gær.