Hæsti­réttur Brasilíu hafnar kröfu Sverris Þórs

Beiðnin var lögð fram af verjanda Sverris, Nefi Cordeiro, og var til umfjöllunar í réttinum dagana 28. mars til 4. apríl. Dómurinn taldi ekki tilefni til að hnekkja fyrri ákvörðunum undirdómstóla um varðhald.

Sagðist sjálf hafa aflað sér tekna sem fylgdarstúlka

Mál Sverris Þórs, betur þekktur sem Sveddi Tönn, hófst í kjölfar umfangsmikilla aðgerða brasilísku alríkislögreglunnar undir nafninu Operation Match Point. Hann er grunaður um að hafa komið að smygli á miklu magni fíkniefna frá Suður-Ameríku til Evrópu og Íslands. Einnig er hann ákærður fyrir að hafa þvegið fé í gegnum bankareikninga og eignir skráðar á nafni annarra – þar á meðal konu að nafni Deborah D. D. S. M. M., sem lýsti tengslum sínum við Sverri fyrir dómi sem „faglegum“.

Að beiðni lögreglu hafa nokkrar eignir verið frystar í tengslum við rannsókn málsins. Þar á meðal eru íbúð í Montes Claros sem var greidd að fullu með fjármunum sem ákæruvaldið telur rekja til Sverris, ný Honda HR-V bifreið sem Deborah keypti árið 2022, og yfir 50.000 brasilískar rílur á bankareikningi sem hefur verið frystur.

Deborah hefur haldið því fram að hún hafi sjálf aflað þessara tekna sem fylgdarstúlka og að þær hafi staðið undir kaupum eignanna. Dómstólar hafa þó hafnað kröfum hennar um að eignirnar verði leystar úr haldi og telja sterkar vísbendingar um að fjármunirnir séu hluti af skipulagðri glæpastarfsemi.

Í gögnum sem lögregla hefur lagt fram, þar á meðal símtölum, fjármálaskjölum og öðrum heimildum, kemur fram að Sverrir hafi nýtt sér eignir skráðar á nafni annarra til að dylja raunverulegt eignarhald og uppruna fjár, sem er þekkt aðferð í peningaþvætti.

Sverrir og Deborah hafa bæði verið ákærð fyrir peningaþvætti og tengsl við alþjóðlegt fíkniefnaviðskiptanet. Enn hefur ekki fallið endanlegur dómur í málinu, sem heldur áfram fyrir dómstólum í Brasilíu.