Ungu strákarnir björguðu and­liti Man United í Hong Kong

Leikmenn United enduðu þetta vonbrigðartímabil með ferðinni til Suðaustur Asíu og höfðu tapað á móti malasísku úrvalsliði fyrr í ferðinni þar sem baulað var á enska liðið eftir 1-0 tap.

Þetta leit því enn verr út þegar Hong Kong komst yfir í dag eftir tuttugu mínútna leik. Markið skoraði Juninho, fyrrum kantmaður Rangers.

Staðan var enn 1-0 fyrir Hong Kong í hálfleik en Ruben Amorim skipti öllu liðinu sínu út í hálfleik.

Bruno Fernandes og Alejandro Garnacho byrjuðu báðir en enskir fjölmiðlar keppast við að skrifa um mögulega brottför þeirra beggja frá félaginu.

Ungi framherjinn Chido Obi kom inn á sem varamaður í hálfleik og hann sneri við leiknum með tveimur mörkum.

Það fyrra skoraði hann í byrjun hálfleiksins eftir sendingu frá Manuel Ugarte en það síðara átta mínútum fyrir leikslok eftir stoðsendingu Mason Mount.

Annar ungur strákur, miðvörðurinn Ayden Heaven, skoraði síðan þriðja markið í uppbótatíma leiksins en enn einn guttinn, Amad Diallo, lagði það mark upp.