Neymar reyndi að skora eins og Maradona en fékk rauða spjaldið

Neymar fékk nefnilega rauða spjaldið í eins marks tapi á móti Botofogo á heimavelli.

Staðan var 0-0 þegar fimmtán mínútur voru til leiksloka. Neymar stóðst þá ekki freistinguna og reyndi að stýra boltanum yfir marklínuna með hendinni.

Það muna margir eftir markinu sem Diego Maradona skoraði með hendinni á HM í Mexíkó 1986. Maradona komst upp með það en ekki Neymar.

Dómarinn gaf Neymar sitt annað gula spjald og þar með rautt.

Til að bæta gráu ofan á svart þá skoraði Botofogo sigurmark manni fleiri. Artur Victor Guimaraes skoraði eina mark leiksins á 85. mínútu.

Santos liðið er í vandræðum í brasilísku deildinni og er í fallsæti með aðeins átta stig í fyrstu ellefu leikjunum.

Neymar hefur aðeins spilað fjóra af þessum leikjum og hefur hvorki skorað né lagt upp mark. Hann er hins vegar með fjögur spjöld, þrjú gul og eitt rautt.