Varð undir bílhræi ofan í járntætara og fær 150 milljónir

Þetta var niðurstaða Héraðsdóms Reykjavíkur, sem kvað upp dóm í málinu þann 21. maí síðastliðinn og birti í dag. Í dóminum segir að maðurinn hafi aðallega krafist þess að Sjóvá greiddi honum 147 milljónir króna auk vaxta og dráttarvaxta.

Menntaður mannauðsstjóri en fékk ekki vinnu við hæfi

Í dóminum er málsatvikum lýst svo að maðurinn hefði útskrifast úr menntaskóla, með áherslu á viðskiptastjórnun, og mannauðsstjórnun í háskóla í heimalandinu. Skömmu eftir að hann útskrifaðist hafi hann leitað sér að vinnu sem hæfði þeirri menntun sem hann hafði aflað sér. Hann hafi verið tekinn í atvinnuviðtöl en ekki orðið fyrir valinu. Á meðan hann leitaði sér vinnu við hæfi hafi hann unnið í vöruhúsi.

Vorið 2019 hafi hann komið hingað til lands og fengið, í gegnum starfsmannaleigu, starf við sorpendurvinnslu. Þar hafi hann starfað í tvær vikur en eftir það aflað sér sjálfur vinnu hjá ónefndri málmendurvinnslu, þar sem allmargir samlandar hans hefðu starfað í mörg ár.

Varð undir bílhræi ofan í járntætara 

Þar hefði hann starfað í fjóra mánuði þegar hann þurfti að fara niður í stóran járntætara þar sem renna liggur niður að valsi sem tætir málma í sundur. Hann hafi verið neðst í rennunni þar sem valsinn þjappar málmstykkjum saman áður en tætarinn tekur við að herða bolta á hlífðarplötum valsins, sem hafi ekki verið í gangi.

„Á meðan stefnandi var að herða boltana henti stjórnandi krana við hlið tætarans bílhræi í rennuna sem rann á stefnanda þannig að hann klemmdist undir hræinu. Hann hlaut afar alvarlegan mænuskaða (C5–C6). Hann er í hjólastól og þarf aðstoð með nær allar daglegar athafnir og fær þrálátar sýkingar í þvagfæri, blöðru og nýru.“

Fékk upphaflega innan við fimmtíu milljónir

Bæklunarlæknir og lögmaður hafi metið afleiðingar slyssins fyrir manninn. Niðurstöður þeirra hafi verið að maðurinn væri með 90 stiga varanlegan miska og 100 prósenta varanlega örorku.

Á grundvelli þessa mats hafi maðurinn gert kröfu í frjálsa ábyrgðartryggingu málmendurvinnslunnar hjá Sjóvá og krafist bóta miðað við annað árslaunaviðmið en því sem fékkst hefði verið miðað við tekjur hans síðastliðin þrjú ár fyrir slys, líkt og venjan er. Sú kröfugerð hafi byggt á heimild skaðabótalaga til að miða árstekjur við sérstakar aðstæður.

Rúmu ári eftir slysið hafi Sjóvá greitt manninum tæplega 48 milljónir króna úr ábyrgðartryggingunni. Sú upphæð hafi miðað við lágmarksárslaun skaðabótalaga.

Fær bætur miðað við starf sem hann vann í fjóra mánuði

Í dóminum segir að niðurstaða dómsins hafi verið að aðstæður sem varða atvinnu og atvinnuþátttöku mannsins séu óvenjulegar í skilningi skaðabótalaga. Að mati dómsins liggi ekki annað fyrir en að þau laun sem hann hafði hjá málmendurvinnslunni þá fjóra mánuði sem hann vann þar gefi réttasta mynd af þeim launum sem hann hefði haft til frambúðar, hefði hann ekki slasast.

Í málsástæðum sínum byggði maðurinn á því að reiknuð árslaun hans hjá málmendurvinnslunni hefðu alls numið tæplega ellefu milljónum króna. Lágmarkslaun sem Sjóvá byggði á hafi aftur á móti aðeins numið 3,5 milljónum.

Þá segir að fallast megi á kröfu mannsins um annan kostnað, meðal annars lyfjakostnað, að álitum. Sjóvá greiði manninum því 146,7 milljónir króna, með vöxtum frá slysdegi og dráttarvöxtum frá september 2021. Þá greiði Sjóvá allan gjafsóknarkostnað mannsins, 2,5 milljónir króna, í ríkissjóð.