Söfnuðu milljón krónum fyrir ungt fólk með krabba­mein

Góðgerðardagurinn var haldinn í annað sinn í ár. íbúar voru í aðdraganda dagsins beðnir um að styrkja nemendur um hundrað krónur til innkaupa á hráefnum. Á góðgerðadeginum sjálfum seldu nemendur svo mat, drykk og varning til styrktar Krafti, stuðningsfélag fyrir ungt fólk sem greinst hefur með krabbamein.

„Við vorum að selja kandýfloss, vorum með nammipoka og vorum með svona dart blöðru leik og gjafabféf,“ segir Frosti Hrannarsson, nemandi í 8. bekk.

Nemendur skipulögðu daginn saman.

„Það var góðgerðardagur í fyrra sem gekk svo vel og við vildum gera það aftur, þannig við í nemendaráði komum með hugmyndina,“ segir Gísli Baldur Garðarsson.

Þau hafi valið að styrkja Kraft því þeim þyki það mikilvægt málefni.

Þau segja flesta hafa tekið þeim vel þegar þau óskuðu eftir stuðningi.

„Það voru allir til í þetta,“ segir Úlfhildur Júlía Stephensen, meðstjórnandi í nemendaráði Valhúsaskóla.

Gísli Páll tekur undir það en viðurkennir þó að sum símtölin hafi verið smá vandræðaleg.

Helga Þórdís Jónsdóttir, skólastjóri, segist afar stolt af nemendum sínum. „

Þau stóðu sig með prýði. Þau hringdu, sendu tölvupóst og fóru í fyrirtæki. Þetta var ótrúlega flott hjá þeim. Við náðum að safna einni milljón, eitt hundrað tuttugu og tvö þúsund. Þannig þetta var ótrúlega flott hjá krökkunum.