Boða tæp 10% þjóðarinnar á hlut­hafa­fund

Stjórn Íslandsbanka tilkynnir í Kauphallartilkynningu að bankinn hafi boðað til hluthafafundar í bankanum sem haldinn mánudaginn 30. júní, kl. 16:00.

Fundurinn er í höfuðstöðvum Íslandsbanka að Hagasmára 3 í Kópavogi en kostur verður gefinn á rafrænni þátttöku á fundinum. Ólíklega mun Hagasmárinn rúma alla hluthafa bankans enda eru þeir nú orðnir 30 þúsund eftir útboðið á eftirstandandi hlut ríkisins í bankanum. 

Atkvæðagreiðsla á fundinum mun alfarið fara fram rafrænt, óháð því hvort hluthafar mæti á fundarstað eða taki þátt rafrænt, segir í tilkynningunni. 

Fundurinn fer fram á íslensku, en boðið verður upp á túlkaþjónustu á ensku. Í tilkynningunni er enn fremur tekið fram að öllum hluthöfum sé heimilt að sækja hluthafafund, taka þar til máls og neyta atkvæðisréttar síns.