Greindi sjálfur frá því að hann hafi verið rekinn

Ítalía mæti Moldóvu í undankeppni HM á morgun, en Spalletti greindi frá því á blaðamannafundi í dag að það yrði hans síðasti leikur sem stjóri ítalska landsliðsins.

Ítalir máttu þola 3-0 tap gegn Noregi síðastliðinn föstudag og virðist tapið hafa verið kornið sem fyllti mælinn hjá ítalska knattspyrnusambandinu. Það var fjórði leikur liðsins í röð án sigurs, og þriðja tap liðsins í síðustu fjórum leikjum.

„Ég átti fund með Gabriele Gravina, forseta knattspyrnusambandsins, í gærkvöldi. Þá sagði hann mér að mér yrði sagt upp störfum sem þjálfari landsliðsins,“ sagði Spalletti á blaðamannafundi í dag.

„Ég ætlaði mér ekki að gefast upp. Ég hefði viljað halda áfram í minni stöðu og að vinna mína vinnu. Ég verð á hliðarlínunni á morgun á móti Moldóvu, en svo leysum við samningsmálin.“