Aftur Bellingham í Dortmund eftir met­sölu

Jobe Bellingham kemur til Dortmund fyrir 32 milljónir evra eftir að hafa átt sinn þátt í að koma Sunderland upp í ensku úrvalsdeildina á nýafstaðinni leiktíð. Þetta gerir hann að dýrasta leikmanni í sögu Sunderland.

Þessi 19 ára miðjumaður spilaði níutíu leiki fyrir Sunderland á tveimur árum hjá félaginu en hann hóf ferilinn með Birmingham rétt eins og Jude sem er tveimur árum eldri.

Jobe Bellingham var valinn besti ungi leikmaðurinn í ensku B-deildinni í vetur. Hann skrifaði undir samning til fimm ára við Dortmund og má spila með liðinu á HM félagsliða sem nú fer að hefjast.

„Ég er ánægður með að fá að keppa um titla með þessu frábæra félagi. Ég mun gera allt sem ég get til að ná árangri með þessum stórkostlegu stuðningsmönnum,“ segir Jobe í fréttatilkynningu.

„Jobe er einstaklega hæfileikaríkur leikmaður sem, þrátt fyrir ungan aldur, býr þegar yfir eftirtektarverðum þroska og leikskilningi. Við erum handviss um að hann passi fullkomlega inn í okkar hugmyndafræði, þar sem við gefum ungum leikmönnum tækifæri til að þróast á hæsta stigi,“ segir Lars Ricken, yfirmaður íþróttamála hjá Dortmund.