Freyr missir stjörnuleikmann í marga mánuði

Freyr Alexandersson þjálfar lið Brann sem er eins og er í öðru sæti norsku úrvalsdeildarinnar.

Brann tilkynnti á miðlum sínum að leikmaðurinn öflugi sé á leiðinni í aðgerð.

„Castro hefur verið að glíma við mikinn verk í ökklanum í langan tíma og þetta hefur haldið honum frá leikjum. Meðferð okkar og endurhæfing hafa ekki gengið upp og við teljum það því nauðsynlegt að hann fari í aðgerð á ökklanum,“ sagði Arne Instebö, læknir Brann.

„Það er ekki ljóst hversu lengi hann verður frá keppni en það verða einhverjir mánuðir,“ sagði Instebö.

Brann vann fimm síðustu leiki sína með Castro í byrjunarliðinu en hefur aðeins unnið tvo af fimm án hans.

Castro er með þrjú mörk og eina stoðsendingu í sex deildarleikjum á leiktíðinni.