Daninn orðinn stjóri Tottenham

Samningur Franks við Tottenham er til þriggja ára. Hann tekur við Tottenham eftir að hafa stýrt Brentford síðustu sjö ár, og þar áður verið aðstoðarstjóri, og fær Brentford tíu milljónir punda frá Tottenham eða jafnvirði um 1,7 milljarðs króna.

Á heimasíðu Tottenham segir að Frank hafi umturnað liði Brentford á tíma sínum hjá félaginu og farið langt fram úr væntingum. Hann sé einn einn framsæknasti og nýstárlegasti þjálfarinn í heiminum í dag og hafi sannað sig í þróun leikmanna og liðs.

Postecoglou var rekinn þrátt fyrir að Tottenham næði að vinna sinn fyrsta titil í sautján ár á seinna tímabili liðsins undir hans stjórn, með því að vinna Evrópudeildina. Liðið átti skelfilega leiktíð í ensku úrvalsdeildinni og endaði þar í 17. sæti en Brentford, undir stjórn Franks, endaði í 10. sæti þrátt fyrir að hafa selt stjörnuframherjann Ivan Toney fyrir tímabilið.

Thomas Frank tók við Brentford haustið 2018 þegar liðið sat um miðja næstefstu deild. Undir hans stjórn fór liðið tvisvar í úrslitaleik upp á sæti í ensku úrvalsdeildinni og vann í seinna skiptið, árið 2021. Brentford náði sínum besta árangri á nýliðinni leiktíð og daðraði lengi vel við Evrópubaráttu.

Frank verður að mestu áfram með sama teymi og hjá Brentford með sér en þó bætist við Andreas Georgson sem þjálfari frá Manchester United.