Baulað stans­laust á Carlos Tevez í góðgerðaleik á Old Trafford

Tevez tók þátt í SoccerAid leiknum og fór á kostum. Hann skoraði fernu í leiknum þrátt fyrir að áhorfendur hafi baulað stanslaust á hann allan tímann sem hann var inn á vellinum.

Um leið og Tevez snerti boltann þá bauluðu stuðningsmenn Manchester United.

Þeir voru enn sárir síðan að Tevez fór frá Manchester United til nágrannanna í Manchester City í júlí árið 2009.

Tevez hafði unnið tvo Englandsmeistaratitla með United en hjálpaði Manchester City að vinna sinn fyrsta Englandsmeistaratitil í 44 ár vorið 2012.

Tevez skoraði 19 mörk í 63 deildarleikjum með United en 58 mörk í 113 deildarleikjum með City.

Hann er nú 41 árs gamall en enn í smá formi eins og hann sýndi á gamla heimavelli sínum i gær.

Eftir fjórða markið sitt í leiknum þá lyfti Tevez upp skyrtu sinni og benti á eyrað sitt.

Það verður þó að taka það fram að mótstaðan var nú ekki mikil í þessum leik sem var auðvitað mest til gamans og til að safna pening fyrir þarft málefni.