„Ég vil drepa Manchester United“

City gekk á dögunum frá kaupunum á Rayan Cherki frá Lyon. Cherki sparaði ekki yfirlýsingarnar í fyrsta viðtali sínu sem leikmaður Manchester City.

Stuðningsmenn City eru örugglega ánægðir með þá staðreynd að nágrannar þeirra í United séu aðalskotmarkið hjá Frakkanum. Breska ríkisútvarpið segir frá.

„Ég var ekki hrifinn af því þegar Manchester United vann leikinn á móti Lyon því ég er Lyonnais maður, sagði Cherki. United átti magnaða endurkomu á móti Lyon í Evrópudeildinni eftir að hafa lent tveimur mörkum undir í framlengingunni.

United vann leikinn 5-4 og þar með 7-6 samanlagt en þessi leikur var í átta liða úrslitunum í apríl.

„Nú bíð ég eftir leiknum á móti þeim. Ég vil drepa Manchester United. Ég er mættur hingað til að vinna alla leiki,“ sagði Cherki.

„Ég vildi bara fara til Manchester City,” sagði Cherki. Hans fyrstu leikir með liðinu verða væntanlega í heimsmeistarakeppni félagsliða í Bandaríkjunum.

Cherki er 21 árs gamall en hann kom til Lyon þegar hann var bara sjö ára. Hann hefur spilað með aðalliði félagsins frá því hann var sautján ára gamall.

Á síðasta tímabili þá var Cherki með 12 mörk og 19 stoðsendingar í 43 leikjum í frönsku deildinni og Evrópudeildinni. Öflugur leikmaður þar á ferðinni.