Aðstand­endur Secret Sol­stice standa að nýrri há­tíð sem hefst með al­myrkvanum

Hátíðin, Iceland Eclipse, stendur yfir dagana 12. til 15. ágúst 2026. Samkvæmt tilkynningu verða bæði innlendir og erlendir tónlistamenn, listasýningar, fyrirlestrar og sérstakir viðburðir sem tengjast staðnum og stjörnunum.

Ekki verða seldir fleiri en fimm þúsund miðar og verður samkvæmt tilkynningu lögð verði áhersla á sjálfbæra framkvæmd og góða tengingu við heimamenn og náttúruna. Gistimöguleikar verði margir og fjölbreyttir, allt frá tjaldsvæðum yfir í glamping ásamt ýmsum öðrum spennandi möguleikum.

Íbúar jákvæðir

Kári Viðarsson, íbúi á Hellissandi, segir þetta stórt og spennandi verkefni sem verði frábær innspýting fyrir fólk á Vesturlandi. Kári ræddi þetta verkefni ásamt Jóni Bjarna Steinssyni í Bítinu á Bylgjunni í morgun. Jón Bjarni er hluti af því teymi sem skipulagði tónlistarhátíðina Secret Solstice sem síðast fór fram árið 2021.

Hann segir tónlistina á þessari nýju hátíð ekki verða eins og það sem var á Secret Solstice. Það verði rólegra yfir og lágstemmdara. Hann líkir hátíðinni við Burning Man og það verði jóga, hugleiðsla, fyrirlestrar og vinnustofa. Hátíðin sé þannig ekki bara tónlistarhátíð heldur líka menningarhátíð.

Fram hefur komið í fréttum í tengslum við almyrkvann að Ísland sé þegar uppselt en Kári segir að með hátíðinni sé í raun verið að koma með fimm þúsund ný gistirými í tjöldum, húsbílum og fleiri rýmum. Þá séu þau einnig í samstarfi við íbúa á svæðinu um gistingu. Þeir hafi haldið íbúafund og Jón Bjarni sagðist í fyrsta skipti hafa upplifað það að það væri klappað fyrir sér. Það hafi hann ekki upplifað á íbúafundum í Laugardal eftir Secret Solstice. Íbúar og bæjaryfirvöld séu jákvæð og samstarfið gott.

Jón Bjarni segir ekki liggja fyrir hvaða listamenn komi fram en það sé búið að bóka tvær íslenskar hljómsveitir. IMXP muni sjá um að bóka erlenda listamenn. Fyrsti dagskrárliður hátíðarinnar er almyrkvinn og formleg dagskrá hefst að honum loknum.

Viðtalið er lengra og er hægt að hlusta á það í heild sinni að ofan. 

Byggir á sömu hugsun og Solstice

„Þó að Iceland Eclipse sé nýr viðburður, þá byggir hann á sömu hugsun og Secret Solstice. Að skapa eitthvað sérstakt, minnisstætt og á okkar eigin forsendum. Að bjóða fólki að koma saman, njóta og tengjast, á óvenjulegum stað og á einstökum tíma. Við hlökkum til að segja ykkur meira næstu mánuði,“ segir í tilkynningunni.

Jón Bjarni Steinsson, einn skipuleggjenda, segir aðstandendur Solstice stolta að taka þátt í þessu nýja verkefni.

„Við sem stóðum að Secret Solstice höfum fengið að upplifa margt stórt og sérstakt. Nú höfum við ákveðið að taka næsta skref. Þetta er alþjóðlegur viðburður, framleiddur í samstarfi við bandaríska fyrirtækið Immersive Experiences (IMXP) sem hafa sérhæft sig í slíkum verkefnum víða um heim, og við leggjum okkar af mörkum héðan að heiman. Við höfum farið inn í Langjökul, ofan í Raufarhólshell og látið listamenn síga í Þríhnúkagíg – næst á dagskrá er sólmyrkvi við rætur Snæfellsjökuls,“ segir Jón Bjarni.

Einstakt augnablik

Eins og fjallað hefur verður almyrkvi á sólu sjáanlegur á Íslandi þann 12. ágúst á næsta ári. Jón Bjarni segir Hellissand einn besta staðinn til að upplifa hann.

„Þar verður hann einna lengstur á landinu, rúmar tvær mínútur, og myrkrið fellur yfir rétt eftir klukka 17:45. Það verður einstakt augnablik, og í kjölfarið tekur við fjölbreytt dagskrá sem blandar saman tónlist, listum, náttúru og sameiginlegri upplifun.“

Forsala á hátíðina hefst á eclipse.is í dag og formleg miðasala í lok sumars. Reiknað er með því að meirihluti gesta verði erlendir. Miðinn verður ekki ódýr að sögn þeirra Jóns Bjarna og Kára.