Chelsea á­fram eftir tveggja klukku­tíma töf og fram­lengingu

Chelsea vann á endanum 4-1 eftir framlengingu en gera varð tveggja klukkutíma hlé á leiknum þegar skammt var til leiksloka í venjulegum leiktíma og Chelsea var 1-0 yfir.

Þrumuveður í nágrenni vallarins varð til þess að liðin voru kölluð af velli fimm mínútum fyrir leikslok.

Reece James hafði þá skorað eina mark leiksins með skoti beint úr aukaspyrnu á 64. mínútu.

Benfica tókst bæði að jafna leikinn og missa mann af velli með rautt spjald eftir að leikurinn hófst á ný eftir tveggja klukkutíma töf.

Gianluca Prestianni fékk rauða spjaldið þegar tvær mínútur voru liðnar af uppbótatímanum en Angel di Maria tryggði Benfica framlengingu þremur mínútum síðar með marki úr vítaspyrnu.

Chelsea skoraði þrjú mörk í framlengingunni þar sem liðið var ellefu á móti tíu.

Mörkin skoruðu þeir Christopher Nkunku, Pedro Neto og Kiernan Dewsbury-Hall en þau komu öll á níu mínútna kafla.