Hefur í hótunum við New York vegna „kommún­istans“ Mamdani

Sigur Mamdani, 33 ára sósíaldemókrata, í forvali Demókrataflokksins fyrir borgarstjórnarkosningarnar hefur valdið nokkrum titringi bæði innan flokksins og utan.

Trump sagði til að mynda í viðtali við Fox News um helgina að það væri ómögulegt að Mamdani færi með sigur í kosningunum, þar sem hann væri „pjúra kommúnisti“.

„Orðum þetta svona; ef hann sigrar, þá er ég forseti, og hann þarf að gera rétt, annars fá þeir engan pening. Hann þarf að gera rétt eða þeir fá engan pening,“ sagði forsetinn, sem hafði áður sagt að Mamdani liti hryllilega illa út og væri síður en svo vel gefinn.

Fjárframlög ríkisins til New York borgar námu um 100 milljörðum dala í fyrra.

Mamdani mætti sjálfur í viðtal til NBC í gær og neitaði því að vera kommúnisti.

Hann sagðist hins vegar þegar hafa neyðst til að horfast í augu við að forseti landsins „muni tala um það hvernig ég lít út, hvernig ég hljóma, hvaðan ég er, hver ég er - af því að hann vill afvegaleiða umræðuna frá því sem ég berst fyrir,“ sagði Mamdani.