Snurða hljóp á þráðinn í nótt

Starfsáætlun Alþingis var kippt úr sambandi fyrir tæpum mánuði en samkvæmt henni var stefnt að þingfrestun hinn þrettánda júní. Enn er þó fundað á Alþingi og standa umræður um breytingar á veiðigjaldi nú yfir.

Þingflokksformenn reyna nú að ná saman um þinglok og hafa fundað stíft undanfarna daga.

„Við þingflokksformenn höfum fundað svo gott sem alla helgina og fram á nótt og ég hef ekki fundið neitt annað en einlægan samningsvilja beggja vegna borðsins,“ segir Hildur Sverrisdóttir, þingflokksformaður Sjálfstæðisflokksins.

Ljóst er að viðræðurnar eru á viðkvæmu stigi og trúnaður ríkir um það sem fer þar fram. Samkvæmt upplýsingum fréttastofu miðaði viðræðum áfram um helgina en snurða hljóp á þráðinn í nótt og meiri óvissa þykir nú ríkja um framhaldið.

Þingflokksformenn funduðu með forseta Alþingis í morgun og ekki er útilokað að þeir muni funda í dag þrátt fyrir að ekkert hafi verið ákveðið.

Er eitthvað farið að sjást til lands? 

„Þetta er eins og öldufallið. Við komumst talsvert áfram og svo kemur smá hikst en svo er haldið áfram,“ segir Hildur.