Maðurinn sem fann upp mew-ið er látinn

Greint er frá andliti Mew á heimasíðu IAFGG (Orthotropics), alþjóðlegra samtaka um stýringu andlitsvaxtar sem Mew stofnaði. Mew hafi látist friðsællega á heimili sínu.

Mew fæddist árið 1928 í Kent, lærði tannlækningar í University College í Lundúnum og kjálkaskurðlækningar við Queen Victoria-spítala í East Grinstead.

Vexti andlitsins stýrt með mew-i

Mew var brautryðjandi í tannleiðréttingaraðferð sem hann kallaði orthotropics. Aðferðin byggðist á því að stýra andlitsvexti sjúklings með því að láta hann nota góm, breyta mataræði sínu og leggja tungu sína upp að efri góm, sem gerir að verkum að kjálkinn verður meira áberandi, sem hefur verið kallað að mew-a.

Mew taldi gen ekki valda því að fólk var með skakkar tennur heldur væru það umhverfisaðstæður. Hann taldi sömuleiðis að tannleiðréttingar á borð við spangir ekki leysa undirliggjandi ástæður skekkjunnar og því jafnvel valda andliti viðkomandi skaða.

Tannleiðréttingarlæknasamfélagið tók ekki vel í kenningar og aðferðir Mew. Tannlæknaráðið GDC (General Dental Council), stofnun sem vaktar störf breskra tannlækna, áminnti Mew fyrir auglýsingar sem innihéldu villandi upplýsingar. Stofnunin hélt því fram að Mew græfi undan tannleiðréttingum og hefði logið til um hve viðurkenndar aðferðir hans væru. 

Mew vann með orthotropics-aðferð sína í meira en þrjátíu ár og stofnaði samtökin IAFGG í kringum hana. Michael Mew, sonur Johns, hefur viðhaldið orthotropics-aðferðinni en var árið 2019 rekinn úr Félagi breskra tannleiðréttingarlækna (BOS). Þrátt fyrir vinsældir mew-sins hafa engar rannsóknir sýnt fram á að aðferðir Mew virki.

Mew-ið fer á flug

Helsta einkenni aðferðafræði Mew er munnþjálfun sem kallast að mew-a. Sjálfur sagði Mew að hún byggðist fyrst og fremst á því að „standa uppréttur og halda kjafti“ en mew-ið felst í að þrýsta tungunni upp í efri góm.

Mew-ið varð frægt á samfélagmiðlum meðal áhrifavalda og netverja árið 2019. Í kjölfarið tók gula pressan að fjalla um mew-ið og Mew-feðgarnir fóru meira að segja í breska sjónvarpið til að bera út boðskap mew-sins. Samfélagsmiðlar á borð við Reddit og TikTok áttu stóran þátt í að dreifa vinsældum mew-sins.

Æðið náði meira að segja til Íslands þó það hefði verið mun seinna en annars staðar. Tannlæknirinn Hrönn Róbertsdóttir ræddi við Bylgjuna um mew-ið í fyrra en hlusta má á viðtalið hér að neðan.

Kastali og kappakstur

Mew var meira til lista lagt en það að mew-a. Frá 1957 til 1967 keppti Mew í mótorhjólakappakstri, fyrst í Formúlu 3 og síðan í Formúlu 1.

Hann var árið 1958 valinn í breska landsliðið fyrir keppni í Ameríkubikarnum en gat hins vegar ekki tekið þátt. Þá braut Mew brautarmetið í Brands Hatch tvívegis árið 1963 og bætti þar met tveggja fyrrum heimsmeistara.

Mew byggði sér stóran kastala með síki í Sussex á árunum 1993 til 2001 og bjó síðan þar til æviloka. Kastalinn var sýndur í sjónvarpsþættinum Britain's Best Home.