Taka tíuna af Rashford og segja honum að vera lengur í sumar­fríi

Matheus Cunha, sem United keypti fyrir 62,5 milljónir punda frá Wolverhampton Wanderers, verður í treyju númer tíu á næstu leiktíð.

Það er ekki nóg með að Rashford sé búinn að missa tíuna þá er hann líka er einn af fimm leikmönnum United liðsins sem voru beðnir um það að vera lengur í sumarfríi.

Þeir Rashford, Antony, Jadon Sancho, Alejandro Garnacho og Tyrell Malacia eru líklega allir á förum frá United í sumar og þjónustu þeirra er ekki óskað þegar undirbúningatímabilið hefst.

Rashford er enn bara 27 ára gamall og var í augum flestra framtíðarstórstjarna félagsins. Hann lenti hins vegar upp á kant við Ruben Amorim þjálfara á síðustu leiktíð og var lánaður til Aston Villa.

Leikmennirnir fimm munu þurfa að skila sér til æfinga seinna í júlímánuði takist félaginu ekki að selja þá til annars félags. United ferðast til Chicago í Bandaríkjunum 22. júlí en enska félagið mun spila þrjá æfingarleiki þar.

Samkvæmt heimildum ESPN þá vonast Rashford enn til þess að komast il Barcelona og það eru auknar líkur á því eftir að Nico Williams ákvað að vera áfram hjá Athletic Bilbao. Bayern München er líka annar mögulegur framtíðarstaður.