Aron ráðinn til FH

FH greindi frá á samfélagsmiðlum í morgun. Samkvæmt yfirlýsingu FH mun Aron koma að yngri flokka starfi sem og afreksstarfi hjá FH-ingum og vinna að þeim með stjórn og þjálfurum handknattleiksdeildar félagsins.

Aron hætti handboltaiðkun sem leikmaður í vor er hann vann ungverska meistaratitilinn með Veszprem í Ungverjalandi. Aron kom heim til FH fyrir tímabilið 2023-24 og varð Íslandsmeistari með uppeldisfélaginu. Hann fór svo óvænt á miðju síðasta tímabili frá FH til Veszprem og lauk ferli sínum þar.

Aron er sigursælasti handboltamaður Íslandssögunnar en hann vann 13 landstitla á sínum ferli þar sem hann lék í Danmörku, Þýskalandi, Spáni og Ungverjalandi.

„Ég þurfti ekki að hugsa mig tvisvar um þegar FH leitaði til mín um að koma inn í starfið hjá félaginu. Eins og allir vita þá er ég gríðarlegur FH-ingur og hef miklar skoðanir á því hvernig hægt sé að gera hlutina. Ég hlakka til að vinna með ungum og upprennandi FH-ingum og deila þekkingu minni. Ég vona að sú reynsla sem ég bý yfir muni hjálpa félaginu að eflast enn frekar,“ er haft eftir Aroni í yfirlýsingu FH.

Ágúst Bjarni Garðarsson, formaður handknattleiksdeildar félagsins, segir um hvalreka að ræða fyrir FH-inga.

„Við erum einstaklega stolt af því að fá Aron inn í starfið hjá FH. Hann hefur mikla ástríðu fyrir félaginu og býr yfir einstakri reynslu og þekkingu sem mun hjálpa félaginu á víðum grunni. Aron mun hjálpa FH að taka næstu skref í skipulagi starfsins í heild og gera þannig gott starf ennþá betra.“

Yfirlýsinguna í heild má sjá að neðan.