Spá hita­bylgju í byrjun næstu viku og allt að 29 stigum

Þetta kemur fram í tilkynningu á vef Veðurstofunnar. 

Þar segir að líklegustu landsvæðin til að hreppa hæsta hitann séu Suðurland og Norðurland-Eystra og meiri líkur séu á háum hita inn til landsins. Hæsti hitinn í væntanlegri hitabylgju yrði á bilinu 28 til 29 stig en ekki sé útilokað að kjöraðstæður myndist á stöku mælistöð og hiti mælist þá hærri. 

„Þar með er svolítill möguleiki á að hoggið verði nærri hæsta hita sem mælst hefur á landinu, en það eru 30.5 stig á Teigarhorni við Berufjörð þann 22. júní 1939 (fyrir rúmum 86 árum),“ segir í tilkynningunni.

Þá segir að á höfuðborgarsvæðinu séu líkur á að hiti nái tuttugu stigum á mælistöðinni við hús Veðurstofunnar á Bústaðavegi. Til langs tíma litið gerist slíkt einungis þriðja hvert sumar.

„Hins vegar ber að nefna að þegar hlýtt loft leikur um hafið umhverfis landið, þá hafa þokuský tilhneigingu til að myndast. Þessi þokuský geta látið á sér kræla, einkum við sjávarsíðuna og þá haldið hitanum niðri á meðan,“ segir að lokum.