Ó­trú­leg upp­lifun að vera í al­gjöru myrkri á tón­leikum

Bresku tónlistarmennirnir Sean Booth og Rob Brown hafa undir merkjum Autechre verið leiðandi afl í framúrstefnulegri raftónlist í áratugi. Þeir eru meðal áhrifamestu en jafnframt dularfyllstu nafna í raftónlistarsenunni í dag og hafa byggt upp sérstöðu með tilraunakenndum hljóðheimum, mögnuðum taktfléttum og ófyrirsjáanlegri tónlistarsköpun.

Það sem gerir tónleika þeirra einstaka er að þeir fara fram í myrkvuðum sal, þar sem tónlistin fær að stjórna rýminu og skynfærin eru tekin á nýjar slóðir.

„Ég býst ekki við því að við verðum í myrkri líka, heldur verði ljósin slökkt áður en þeir byrja. Þetta er þeirra trademark. Það fer eftir staðsetningunni hversu dimmt getur orðið en stundum sést í exit ljós og eitthvað þannig. Þeir vilja hafa þetta eins dimmt og það getur orðið.“

Fyrir tónleika fá allir gestir upplýsingar í pósti um fyrirkomulagið, myrkrið og ýmis öryggisatriði.

„En svo eru alltaf starfsmenn með nætursjóngleraugu og ef það er eitthvað sem kemur upp þá er fólki sagt að beina ljósi á símanum upp og þá koma starfsmenn þeim til aðstoðar.“

Hann segir þetta ótrúlega upplifun.

„Þetta setur miklu meiri fókus á hlustun og tekur athyglina af umhverfinu og öðru fólki. Maður hættir að pæla í öllum skynfærum nema hlustun.“

Hann segir hljómsveitina sprottna úr dans- og raftónlistarmenningu 10. áratugarins og það skapist eins konar klúbbastemning á tónleikunum, en þó án allra ljósa.

„Þetta er svipað, en samt allt önnur upplifun. Það er enginn að taka upp eða neitt þannig. Ef þú ert með símann uppi taka allir eftir því og það er ekki væbið, og svo auðvitað sérðu ekkert, þannig það er ekkert að taka upp nema hljóðin.“

Ótrúlegt að fá að hita upp

Hann segir geðveikt að hita upp fyrir þá.

„Maður eiginlega trúir þessu ekki.Þeir hafa verið sterkir áhrifavaldar og eru að mínu mati bestir í þessu sem þeir eru að gera, og frá þessu tímabili. Þeir hafa haldið áfram að prófa sig og eru enn þá að þenja formið, þó þeir séu orðnir eldri.“

Hann segir tónleika fyrir allt áhugafólk um hljóð og hljóðupplifun. „Þetta er einstök upplifun. Sama hvort þú hlustar á rapptónlist, djass, kvikmyndatónlist eða nokkuð annað. Fyrir mig var þetta allavega mögnuð upplifun.“

Tónlistin er spiluð „live“ og því engir tónleikar í raun eins.

„Þú ert ekkert að fara að heyra þetta aftur.“

Örlygur mælir með að kynna sér tónlist hljómsveitarinnar. Þeir hafi fært sig nær tilraunamennsku eftir því sem þeir hafa orðið eldri en alltaf haldið sig í sama bakgrunni raftónlistar. Platan Oversteps geti verið brú á milli þess gamla og nýja.