Lög­regla og sér­sveit hand­tóku fimm vegna gruns um frelsis­sviptingu

„Það var grunur um vopnaburð og þess vegna nutum við aðstoðar sérsveitar,“ segir Börkur Árnason, varðstjóri hjá lögreglunni á Akureyri, í samtali við fréttastofu en sérsveitin er með starfsstöð í bænum. Einn hnífur hafi fundist í aðgerðunum en enginn borið hann á sér.

Hann bætir við að þremur hinna handteknu hafi fljótlega verið sleppt úr haldi lögreglu og til standi að leysa hina tvo út í dag. Ekki verði farið fram á gæsluvarðhald yfir neinum þeirra í tengslum við málið.

Börkur segir málið enn til rannsóknar og lögreglan muni ekki tjá sig frekar um aðgerðina að svo stöddu.

Fram kemur í frétt staðarmiðilsins Akureyri.net að fjöldi fólks hafi fylgst með lögregluaðgerðinni í miðbænum sem hafi staðið yfir í drjúga stund. Þá er haft eftir sjónarvotti að einn hafi verið hlaupinn uppi og snúinn niður á bílastæði við Skipagötu og tveir einstaklingar teymdir út úr porti við Skipagötu 6 og fluttir á brott í lögreglubílum.