Šeško nú helsta skot­mark Rauðu djöflanna

Rasmum Höjlund átti erfitt uppdráttar á síðustu leiktíð og þá gekk Man United almennt hræðilega að skora mörk. Til að bæta úr því hefur félagið keypt Matheus Cunha frá Úlfunum og Bryan Mbeumo frá Brentford. Þeir munu þó hvorugur leika sem fremsti maður ef marka má áráttu Ruben Amorim, þjálfara Man Utd, að fá hreinræktaðan framherja til liðs við sig.

Bæði breska ríkisútvarpið og Sky Sports greina svo frá því að hinn 22 ára gamli Šeško sé nú efstur á blaði hjá Amorim. Framherjinn hefur verið orðaður við Newcastle United fari svo að Alexander Isak verði seldur og er það sagt hafa neytt Man United í að hafa hraðar hendur.

Talið er að Šeško sé með klásúlu í samningi sínum við RB Leipzig sem geri honum kleift að yfirgefa félagið berist tilboð upp á 70 milljónir punda eða þar um bil. Það gera um 11 og hálfan milljarð íslenskra króna.

Amorim hefur lagt mikla áherslu á að fá leikmenn með reynslu úr ensku úrvalsdeildinni og því var Ollie Watkins, 29 ára gamall framherji Aston Villa, um tíma efstur á blaði en Villa vill alls ekki selja.

Því hefur Amorim snúið sér að Šeško þó svo að hann sé ungur og hafi enga reynslu af deildinni á Englandi. Hann er hins vegar einn eftirsóttasti ungi framherji Evrópu og hefur skorað 39 mörk í 87 leikjum fyrir Leipzig.

Šeško er tæplega 1.98 metri á hæð og myndi því gefa auka ógn Man United í loftinu talsvert. Þá er talið að Man United þurfi ekki að selja leikmenn til að kaupa Šeško en félagið vill ólmt losna við Tyrell Malacia, Antony, Jadon Sancho og Alejandro Garnacho. Enginn þeirra fór með liðinu til Bandaríkjanna.

Man Utd tekur á móti Arsenal í 1. umferð ensku úrvalsdeildarinnar þann 17. ágúst.