Gary Busey játar kyn­ferðis­brot

Hann var á sínum tíma sakaður um að hafa káfað á þremur konu, samkvæmt frétt New York Post, og um að hafa reynt að losa brjóstahaldara einnar en játaði að hafa brotið á einni.

Sjá einnig: Gary Busey ákærður fyrir kynferðisofbeldi

Játningin átti sér stað í kjölfar þess að samkomulag náðist um að aðrar kærur gegn honum yrðu felldar niður. Hann stendur frammi fyrir sektum og mögulega skilorðsbundnum dómi í allt að fimm ár en dómsuppkvaðning mun fara fram í næsta mánuði.

Busey, sem er 81 árs gamall, hefur átt í vandræðum undanfarin ár, en hann var skammaður af dómaranum í gær fyrir að opna sér drykk á meðan á fjarréttarhöldunum stóð, eins og sjá má í myndbandi sem blaðamenn TMZ hafa komið höndum yfir.

Busey skaust upp á stjörnuhimininn árið 1978 þegar hann var tilnefndur til óskarsverðlauna fyrir að leika aðalhlutverkið í The Buddy Holly Story. Eftir það vakti hann helst athygli fyrir aukahlutverk í kvikmyndum á borð við Lethal Weapon, Point Break, Under Siege og Predator 2.

Á tíunda áratugnum fór að halla undan fæti hjá leikaranum þegar hann var ákærður fyrir fíkniefnabrot.

Þá hefur hann verið handtekinn vegna heimilisofbeldis og árið 2011 var hann sakaður um kynferðislega áreitni gegn starfsmanni sjónvarpsþáttarins Celebrity Apprentice, sem var í umsjá Donalds Trump.

Árið 1988 lenti hann í mótorhjólaslysi og hlaut varanlegan heilaskaða.