Inn­sýn í molnandi hjóna­band: „Per­sónu­leikinn þinn var ekki svona fyrir nokkrum árum“

Ný stikla fyrir heimildarmyndina In Whose Name? sem birtist á miðvikudag. Leikstjóri myndarinnarNicolas Ballesteros hóf átján ára að fanga persónulegar stundir West og hefur á síðustu sex árum tekið upp þúsundir klukkustunda. 

Stiklan sem er mínútulöng hefst á West segja: „Ég hef ekki verið á lyfjunum mínum í fimm mánuði.“ 

Næst má heyra grátandi Kim segja: „Persónuleikinn þinn var ekki svona fyrir nokkrum árum.“ West greindist árið 2018 með geðhvarfasýki en sagði síðan fyrr á þessu ári að hann væri í raun einhverfur.

Þar á eftir má sjá Kim reyna að róa niður reiðan Kanye sem liggur æstur í leðursófa.

„Aldrei segja mér að ég muni vakna einn daginn og ekki eiga neitt!“ segir Kanye við Kim sem svarar: „Við getum talað um það seinna, en...“

„Það er ekkert en!“ gargar þá Kanye.

Kim Kardashian og Kanye West voru gift í átta ár frá 2014 til 2022 og eiga saman fjögur börn: North, Saint, Chicago og Psalm. Eftir skilnaðinn hefur andað köldu milli þeirra.

Frekar dauður en á lyfjum

Heimildarmyndin sýnir einnig frá framboði West til forseta og sunnudagsmessu-tónleikum sem hann hélt vikulega árið 2019. Á einum þeirra má sjá hann brotna niður og lýsa því yfir að hann hafi skammast sín fyrir að gráta.

„Ég myndi frekar vera dauður en á lyfjum. Annað hvort eyðileggja þau mig, eða ég eyðilegg þau,“ segir hann á einum tímapunkti. 

„Þau eru að drepa hæfni okkar til að hugsa út fyrir kassann!“ segir hann jafnframt.

Stiklan endar svo á því að West segir: „Veistu hvað er það besta við að vera listamaður með geðhvarfasýki? Allt sem þú gerir og segir er listaverk.“

In Whose Name? verður frumsýnd vestanhafs 19. september næstkomandi í völdum kvikmyndahúsum og dettur vonandi inn á streymisveitur seinna á árinu fyrir okkur hin.