Herra Hnetusmjör tekjuhæstur í Iceguys

Agnar Már Másson skrifar 19. ágúst 2025 22:11

Strákasveitin Iceguys er sú langvinsælasta hér á landi þessi misserin. Róbert Arnar

Tónlistarmennirnir í karlakvintettnum Iceguys juku flestir mánaðartekjur sínar milli ára samkvæmt Tekjublaðinu sem kom út í dag. Líklega þéna þeir þó meira í gegnum fyrirtæki sín en það sem fram kemur í blaðinu, en samkvæmt því mun Herra Hnetusmjör hafa verið tekjuhæstur í hópnum.

Auk þess sem fram kemur í Tekjublaðinu má sjá á síðu Skattsins að tekjur félagsins Fegurð er glæpur ehf., sem er félag stofnað í kringum strákasveitina, hafi numið 4,5 milljónum króna í fyrra en hagnaðurinn nam 205 þúsundum króna.

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2023 sem var greiddur árið 2024.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Eigið fé félagsins var neikvætt um 1,4 milljónir króna þar sem félagið er enn að gera upp tveggja milljóna eftir tap árið 2023. Samkvæmt hlutafélagaskrá er tilgangur félagsins tónlistarflutningur, tónlistarútgáfa og tengd starfsemi.

Jón og Frikki hlið við hlið

Jón Ragnar Jónsson, betur þekktur millinafnslaus, er samkvæmt Tekjublaðinu með um 631 þúsund krónur í tekjur á mánuði og beint fyrir neðan hann í blaðinu er yngri bróðir hans, Friðrik Dór Jónsson, með 630 þúsund krónur.

Tekjur þeirra aukast milli ára. Í fyrra var yngri bróðirinn metinn tekjuhærri en sá eldri, þar sem Friðrik var með 543 þúsund krónur á mánuði en Jón með 449 þúsund.

Ekki er að finna ársreikninga JJMusic ehf., félags Jóns, inni á síðu Skattsins og því erfitt að sjá hve mikið hann hefur þénað í gegnum félagið síðasta árið.

Hnetan í methagnaði

Í blaðinu er Árni Páll Árnason, eða Herra hnetusmjör, talinn vera með um 1,1 milljón króna í mánaðartekjur og bætir við sig milli ára en í fyrra nam upphæðin 937 þúsund krónum. Hann er jafnframt tekjuhæsti rappari landsins.

Kópbois ehf., félag í eigu Árna, hagnaðist aftur á móti um 66 milljónir króna á síðasta ári og rekstrartekjur námu tæplega 150 milljónum króna.

Rúrík er á svipuðum stað en Aron bætir við sig

Rúrik Gíslason, fyrirsæta og fyrrverandi knattspyrnumaður, mun hafa verið með um 935 þúsund krónur á mánuði í fyrra sem er svipað og árið á undan en þá nam upphæðin 943 þúsundum.

Rúrik rekur aftur á móti félagið RG19 Viðburðir ehf. en ársreikningur þess félags fyrir síðasta ár liggur ekki fyrir. Árið 2023 nam hagnaður félagsins 31 milljón króna.

Aron Can Gultekin fékk samkvæmt Tekjublaðinu greidd 735 þúsund krónur á mánuði árið 2024, sem er meira en árið á undan en þá mun hann hafa fengið um 531 þúsund krónur greiddar.

Eins og með Rúrik á fyrirtæki Arons, sem heitir Trúpí ehf., eftir að birta ársreikning sinn fyrir 2024 hjá skattinum en árið 2023 námu tekjur félagsins rúmlega átta milljónum króna.

Tekjur Tónlist

Mest lesið

Fleiri fréttir