Allir fimm nefndarmenn studdu þá ákvörðun að vextir Seðlabankans héldust óbreyttur í 7,5 prósentum. Lítil spenna var í aðdraganda vaxtaákvörðunar peningastefnunefndar enda hefur hún verið afar skýr í yfirlýsingum sínum að undanförnu að frekari skref til lækkunar vaxta væru háð því að verðbólgan færðist nær 2,5 prósenta markmiði bankans.
Verðbólgan mælist núna 4,1 prósent eftir að hafa hækkað um 0,3 prósentur frá síðustu ákvörðun í ágúst. Í yfirlýsingu nefndarinnar í morgun er hins vegar bent á að sú hækkun hafi verið fyrirsjáanleg og endurspegli að töluverðum hluta óhagstæð grunnáhrif.
Greinilegur viðsnúningur hefur orðið í þróun efnahagsumsvifa undanfarið og spennan í þjóðarbúinu hefur hjaðnað í takt við þétt taumhald peningastefnunnar.
Ólíkt því sem áður hefur komið fram í yfirlýsingum nefndarinnar að undanförnu þá segir núna að „greinilegur viðsnúningur“ hafi orðið í þróun efnahagsumsvifa og spennan í þjóðarbúinu hjaðnað í takt við þétt taumhald peningastefnunnar.
Sá tónn frá nefndinni er því dúfnalegri en áður. Í framhaldinu er samt bent á að seiglan í þjóðarbúskapnum sé áfram nokkur, launahækkanir mælast töluverðar og þótt verðbólguvæntingar hafi lækkað síðustu misseri sé þær enn yfir markmiði.
Peningastefnunefnd Seðlabankans segir margt hafa „þokast í rétta átt“ en ítrekar samt, líkt og í yfirlýsingu sinni í ágúst, að þær aðstæður hafi ekki enn skapast svo hægt sé að slaka á núverandi raunvaxtaaðhaldi – en það hefur haldist á bilinu um 3,5 til 4 prósent frá því snemma árs 2024. „Ljóst er að frekari skref til lækkunar vaxta eru háð því að verðbólga færist nær 2,5 markmiði bankans,“ segir nefndin.
Þá er í lokin sem fyrr sagt að mótun peningastefnunnar næstu misseri muni ráðast af þróun efnahagsumsvifa, verðbólgu og verðbólguvæntinga.
Mildari tónn Seðlabankans kann að vera til marks um að peningastefnunefndin sé að undirbúa breytta stefnu þannig að hún geti farið að mæla fyrir því að vaxtalækkunarferlið haldi áfram á nýjan leik. Síðasti vaxtaákvörðunarfundur Seðlabankans á þessu ári fer fram 19. nóvember næstkomandi, en ósennilegt er að vextirnir lækki á þeim fundi.
Aðalhagfræðingur Kviku banka sagði í umfjöllun sinni í aðdraganda þessarar vaxtaákvörðunar að hagtölur að undanförnu hefðu sýnt veikan hagvöxt, minni verðbólgu en búist var við og raunverðslækkun fasteignaverðs og ef ekki væri fyrir Ódysseifska leiðsögn Seðlabankans þá hefði sú þróun „hæglega“ getað réttlætt núna 25 punkta vaxtalækkun – þótt hann ætti ekki von á því. Til viðbótar myndi fall Play hafa kælingaráhrif á vinnumarkaðinn en svo virtist sem hann „stæði nærri vendipunkti“ um þessar mundir.
Ekki væri útilokað, að sögn hagfræðings Kviku, að nefndarmenn í peningastefnunefnd myndu nýta færið á fundinum til að opna á vaxtalækkanir við fyrsta tækifæri. Það þyrfti enda ekki mörg eða stór frávik í verðbólgumælingum næstu mánaða til að hægt sé að lækka vexti meðan verðbólgan er jafn nærri vikmörkum.
