Vann Djokovic og tvö­faldaði verðlaunaféð á öllum ferli sínum

Hinn 38 ára gamli Djokovic tapaði í tveimur settum á móti Valentin Vacherot frá Mónakó.

Vacherot er í 204. sæti heimslistans og komst inn í aðalkeppni Masters 1000-mótsins í gegnum undankeppni. Nú gæti hann farið alla leið. Til samanburðar er Djokovic í fimmta sæti heimslistans og hefur unnið mótið í Sjanghæ fjórum sinnum áður.

Í úrslitaleiknum bíður annaðhvort Daniil Medvedev eða Arthur Rinderknech hins 26 ára gamla Vacherot.

Það sést kannski best á hversu óvænt þetta er að Vacherot var fyrir þetta mót búinn að vinna sér inn alls 594 þúsund Bandaríkjadali á öllum ferlinum eða tæpar 73 milljónir króna.

Vacherot er með sigrinum á Djokovic þegar búinn að tryggja sér 597 þúsund dollara í verðlaunafé á þessu móti, rúmar 73 milljónir króna, og hefur með því tvöfaldað verðlaunaféð á öllum ferli sínum.