„Stuðningurinn gaf okkur þessi auka tíu prósent“

„Þetta er stórt. Við ætluðum okkur mikið í þessum leik eins og sást. Við höfum fulla trú á þessu verkefni og ætluðum að sækja til sigurs og ná eins mörgum stigum og við gátum eftir vonbrigðin í síðasta leik,“ sagði Daníel í samtali við Val Pál Eiríksson eftir leikinn á Laugardalsvelli í kvöld.

Íslendingar leiddu í hálfleik, 1-0, og voru skiljanlega sáttir með stöðuna.

„Þeir fengu ekki mörg tækifæri í fyrri hálfleik. Við fengum skyndisóknamöguleika og héldum ágætlega í boltann. Við ætluðum bara að halda áfram að gera það sem við vorum að gera,“ sagði Daníel.

Frakkar náðu forystunni eftir tvö mörk með skömmu millibili í seinni hálfleik.

„Þú þarft bara að slökkva á þér í eina sekúndu og þá sýna þeir hvað þeir geta. Þeir eru með marga leikmenn í háklassa og þér er refsað. Þú þarft að halda einbeitingu í níutíu mínútur og við náðum því ekki alveg en næstum því,“ sagði Daníel.

En hvaðan kom krafturinn til að jafna metin?

„Að vera með fullan völl hérna skiptir miklu máli. Þú fannst stuðninginn og það gaf okkur þessi auka tíu prósent sem við þurftum á að halda,“ sagði Daníel.

Ísland er þremur stigum á eftir Úkraínu sem situr í 2. sæti D-riðils undankeppni HM. Liðin mætast í lokaumferð riðlakeppninnar í næsta mánuði.

„Við erum í bullandi séns og þurfum bara að vinna okkar leiki og þá náum við okkar markmiði. Við förum bara fullir sjálfstrausts í síðustu tvo leikina og vitum hversu góðir við erum,“ sagði Daníel að lokum.