Spenna í Hvera­gerði og Ár­mann stríddi Kefla­vík

Fyrr í kvöld unnu KR-ingar sigur gegn Stjörnunni og því eru Ármann, Stjarnan og Hamar/Þór enn stigalaus eftir þrjár umferðir. Grindavík er eina liðið með fullt hús stiga, eftir sigur sinn á meisturum Hauka sem lesa má um hér.

Það var mikil spenna í lokaleikhlutanum í Hveragerði, eftir að heimakonur minnkuðu muninn í 60-63 með fyrstu körfu leikhlutans. Valskonur náðu þó alltaf að halda forystunni en þegar 43 sekúndur voru eftir minnkaði Jadakiss Guinn muninn í 84-80, og Jóhanna Ýr Ágústsdóttir bjó aftur til spennu með þristi, níu sekúndum fyrir leikslok, eftir afar mikilvæga körfu Ástu Júlíu Grímsdóttur.

Reshawna Stone stóðst hins vegar pressuna á vítalínunni í lokin og innsiglaði sigur Vals.

Þóranna Kika Hodge-Carr varð stigahæst Vals með 23 stig, tók 9 fráköst og átti 4 stoðsendingar. Alyssa Cerino skoraði 18 stig og Stone 16. Hjá Hamri/Þór var Guinn mögnuð með 37 stig og 13 fráköst en það dugði þó ekki til.

Ármann náði fimmtán stiga forskoti

Ármann hefur átt erfitt uppdráttar í fyrstu leikjum sínum en liðið byrjaði vel gegn Keflavík í kvöld og komst í 25-10, en Keflavík skoraði átta síðustu stig leikhlutans og minnkaði muninn í sjö stig.

Annar leikhluti var svo ekki hálfnaður þegar Keflavík hafði komist yfir og gestirnir náðu tíu stiga forskoti fyrir hálfleik, 49-39. Keflvíkingar náðu svo jafnt og þétt að bæta við forskotið og vinna að lokum öruggan 22 stiga sigur.

Sara Rún Hinriksdóttir fór á kostum og skoraði 27 stig fyrir Keflavík í kvöld. Systurnar Anna Ingunn og Agnes María Svansdætur skoruðu 18 og 17 stig, og Bríet Sif Hinriksdóttir 16. Hjá Ármanni var Sylvía Rún Hálfdanardóttir atkvæðamikil með 14 stig og 13 fráköst. Khiana Johnson var stigahæst með 17 stig, Jónína Þórdís Karlsdóttir skoraði 16 og Nabaweeyah Ayomide Mcgill 15.