Sýrlendingar sam­þykkja að taka við Kourani

Líkt og Vísir greindi frá um miðjan september, hefur Kourani afsalað sér alþjóðlegri vernd hér á landi og Útlendingastofnun hefur birt honum ákvörðun um brottvísun, sem felur í sér þrjátíu ára endurkomubann.

Fangar sem ákveðið hefur verið að vísa af landi brott þurfa samkvæmt lögum um fullnustu refsinga aðeins að afplána helming refsingar sinnar. Kourani mun því aðeins þurfa að afplána fjögur ár af átta ára dómi sem hann hlaut í fyrra fyrir tilraun til manndráps.

Vill náðun af heilbrigðisástæðum

Það er að segja ef umsókn hans til náðunarnefndar um náðun af heilbrigðisástæðum verður hafnað. Fallist nefndin hins vegar á náðunarbeiðnina mun hann geta um frjálst höfuð strokið að undangengnu samþykki dómsmálaráðherra og forseta Íslands. 

Þá vantar aðeins eitt til þess að unnt verði að flytja hann til síns heima í Sýrlandi, samþykki þarlendra yfirvalda. Samkvæmt heimildum Vísis hafa stjórnvöld Íslands og Sýrlands átt í samtali vegna máls Kouranis og Sýrlendingar þegar samþykkt að taka á móti honum. Það samþykki hafi raunar legið fyrir lengi.

Nú stendur það því aðeins á náðunarnefnd að Kourani verði fluttur til Sýrlands. Náðunarbeiðni hans hefur nú verið til meðferðar hjá nefndinni í rúman mánuð. Málsmeðferðartími hennar getur að sögn kunnugra verið mjög mislangur, allt frá einum mánuði til tíu mánaða.

Hefur valdið usla á Kleppi

Kourani var nýverið fluttur á réttargeðdeild frá Litla-Hrauni. Frá því að hann hóf afplánun á Litla-Hrauni hefur hann ítrekað ráðist á fangaverði og meðal annars skvett á þá hlandi eða saur.

Líkt og Vísir greindi frá í dag var lögregla kölluð að réttar- og öryggisgeðdeild Landspítalans á Kleppi síðdegis á sunnudag vegna atviks sem sneri að Kourani ásamt sérsveit Ríkislögreglustjóra.

Að sögn fulltrúa lögreglunnar var viðbragðið á sunnudag ekki meira en gengur og gerist þegar lögregla aðstoðar hinar ýmsu stofnanir, sem hún geri reglulega. Aðkoma sérsveitarinnar hafi verið fyrir tilviljun en hún bregðist reglulega við almennum verkefnum þegar fulltrúar hennar eru í nágrenni þeirra.