Hyggjast opna lág­vöru­verslun og Orku­stöð á Blöndu­ósi

Þetta kemur fram í tilkynningu frá Orkunni en þar segir að að baki verkefninu liggi bæði skýrt ákall íbúa um aukna þjónustu við neytendur og vilji sveitarfélagsins til að skapa rými fyrir slíka þróun með skipulagi og samvinnu.

„Samningurinn kemur í framhaldi af vinnu á vegum InfoCapital ehf., í samstarfi við sveitarstjórn Húnabyggðar, með það að markmiði að bæta verulega verslun og þjónustu á svæðinu. Yfir 700.000 bílar aka í gegnum Húnabyggð á ári hverju og mikill vilji er hjá þeim sem standa að verkefninu að bæta þjónustuupplifun þessara gesta sem og íbúa svæðisins,“ segir í tilkynningunni. 

Haft er eftir Guðmundi Hauki Jakobssyni, forseta sveitarstjórnar Húnabyggðar, að það sé óhætt að segja að þetta sé stærsta byggðarfestuverkefni svæðisins í seinni tíð. Nú munu íbúar svæðisins loksins sitja við sama borð og aðrir íbúar landsins hvað þetta varðar. „Þetta verður leikbreytir fyrir svæðið eins og sagt er og verkefninu mun fylgja mikil uppbygging.” segir Guðmundur Haukur.

Lágvöruverslun, Orkustöð, veitingaþjónusta og Löður

Fram kemur að verkefnið hafi hafist árið 2022 þegar InfoCapital ehf. hafi keypt Hótel Blönduós og fleiri eignir í gamla bænum á Blönduósi. 

„Heimafólk sá tækifæri til að bæta þjónustu og verslun á svæðinu og ákveðið var að kanna leiðir til þess. Að þeirri vinnu komu m.a. sveitarstjórnarfólk, sveitarstjóri, skipulagsfulltrúi, hönnuðir, starfsmenn InfoCapital o.fl. InfoCapital stofnaði þá fyrirtækið GB þróunarfélag ehf. utan um verkefnið og viðræður hófust við sveitarfélagið og aðra hagsmunaaðila um staðsetningu og skipulag svæðisins. Drangar hf. hafa nú keypt allt hlutafé í GB þróunarfélagi ehf. og mun leiða verkefnið áfram. Vonir standa til að skipulagsvinnu ljúki á næstu mánuðum og að framkvæmdir hefjist um mitt ár 2026. Verkefnið er stórt og umfangsmikið en fyrst er stefnt að opnun þjónustustöðvar Orkunnar og nýrri lágvöruverslun, þá veitingaþjónustu og að síðustu opnun bílaþvottastöðvar Löðurs.“

Hlakkar til

Haft er eftir Auði Daníelsdóttur, forstjóra Dranga að félagið hlakki til að opna nýja þjónustustöð á Blönduósi og styðja þannig við uppbyggingu í Húnabyggð. „Við leitum stöðugt leiða til efla þjónustuna og þjónustunetið og koma betur á móts við þarfir viðskiptavina. Á Blönduósi mun Orkan mæta þörfum bílaeigenda fyrir eldsneyti og hraðhleðslu á rafmagni og eitt af félögum Dranga á neytendamarkaði mun innan skamms opna lágvöruverslun með fjölbreyttu vöruúrvali,” segir Auður.

Ánægjuleg tilfinning

Loks er haft eftir Reyni Grétarssyni, stjórnarformanni InfoCapital ehf, að með þessu sé ánægjulegt skref stigið fyrir heimafólk og gesti sem staldri við í Húnabyggð. „Það hafa verið forréttindi að fá að leiða þessa hópa saman og eiga Pétur sveitarstjóri og fleiri heimamenn stóran þátt í þessu, við erum þeim þakklátir fyrir það. Að baki liggur umtalsverð vinna, með það að markmiði að nota okkar tengsl og stöðu til að ná fram úrbótum fyrir íbúa þessa svæðis. Það er ánægjuleg tilfinning að sjá að þetta hafi tekist." segir Reynir Grétarsson.

Drangar hf. er móðurfélag fyrirtækja á neytendamarkaði sem saman reka um 160 þjónustustöðvar víðsvegar um land allt. Sameinuð eru fyrirtækin öflugur valkostur fyrir neyendur á Íslandi en þeirra á meðal eru Samkaup, Prís, Nettó, Kjörbúðin, Krambúðin, Lyfjaval, Orkan, Löður og fleiri.