Brassi tekur við af Billups

Billups var handtekinn degi eftir fyrsta leik tímabilsins. Hann er sakaður um að hafa staðið fyrir ólöglegu pókerspili í samráði við mafíuna.

Þjálfarinn er eðli málsins samkvæmt kominn í bann frá þjálfun í deildinni á meðan mál hans verður tekið fyrir. Það gæti tekið ansi langan tíma.

Portland ákvað að ráða aðstoðarmann Billups, Tiago Splitter, sem aðalþjálfara. Sú ráðning er til bráðabirgða á meðan félagið skoðar sína möguleika eftir þessa óvæntu uppákomu.

Hinn fertugi Splitter er Brasilíumaður og varð fyrsti Brasilíumaðurinn sem verður NBA-meistari er hann fór alla leið sem leikmaður San Antonio Spurs árið 2014.

Hann var nýtekinn við sem aðstoðarþjálfari hjá Portland eftir að hafa þjálfað hjá Paris Basketball síðasta vetur.