Stjórn­endur Ís­lands­banka enn undir feldi

Talsverð óvissa ríkir á lánamarkaði í kjölfar dóms Hæstaréttar í máli tveggja lántakenda á hendur Íslandsbanka, þar sem skilmálar um breytilega vexti á óverðtryggðu láni voru dæmdir ólögmætir.

Ekki bætir úr skák að enn bíða þrjú sambærileg, en þó ólík, mál meðferðar hjá Hæstarétti. Þangað til að dómar verða kveðnir upp í þeim er alls óljóst hvers konar skilmála bankar mega skrifa inn í lánasamninga sína. Reikna má með dómi í fyrsta málinu af þremur um miðjan desember.

Landsbankinn reið á vaðið og styttist í viðbrögð Arion banka

Fjöldi lánastofnana hefur þegar brugðist við dóminum með því að breyta framboði á lánum sínum, ýmist tímabundið eða varanlega. Landsbankinn reið á vaðið á föstudag og kynnti nýtt framboð sitt af íbúðalánum, sem felur meðal annars í sér að verðtryggð lán standa nú aðeins fyrstu kaupendum til boða.

Arion banki hefur sett veitingu allra verðtryggðra lána á ís og að sögn forstöðumanns samskiptasviðs bankans er nú unnið að bráðabirgðalausn í þeim efnum. Vonir stjórnenda standi til þess að málin skýrist á næstu dögum.

Fara vel yfir stöðuna

Svipaða sögu er að segja af Íslandsbanka en þar á bæ var gert hlé á veitingu verðtryggðra lána með breytilegum vöxtum á þriðjudag í síðustu viku. 

Að sögn Bjarneyjar Önnu Bjarnadóttur, fjárfestatengils hjá Íslandsbanka, eru stjórnendur bankans enn að fara yfir stöðuna. Von sé á tilkynningu um viðbrögð bankans innan skamms en ekki sé hægt að segja til um nákvæma tímasetningu í þeim efnum.