Hvassir vindstrengir og kraparegn með köflum

Áfram verður hvasst við suðausturströndina á morgun, annars talsvert hægari vindur. Líklega heldur rigning eða slydda áfram með köflum, þó yfirleitt þurrt á Norðvestur- og Vesturlandi. Hiti breytist lítið.

Þetta kemur fram í spá Veðurstofu Íslands í dag. Samkvæmt henni kólnar í veðri í næstu viku þar sem búast má við frosti víðast hvar á landinu.

Veðurfræðingur bendir á í hugleiðingum sínum að alldjúp og víðáttumikil lægð suður af Hvarfi og hæð yfir Grænlandi stjórni veðrinu í dag.

Austan- og norðaustanátt í dag, hvassir vindstrengir með suðausturströndinni og einnig norðvestanlands, en hægari annars staðar.  Lægðin hreyfist austur næstu daga. Eftir helgi verður vindur norðlægari og það kólnar í veðri með éljum fyrir norðan og austan.