Ís­lands­meistari í fimm ára keppnis­bann

Þorsteinn féll á lyfjaprófi í ágúst síðastliðnum. Í heildina var hann dæmdur í sex ára bann, en þar sem hann hefur samþykkt úrskurðinn styttist bannið um eitt ár.

Í úrskurði Lyfjaeftirlitsins, sem má lesa hér, kemur fram að notkun efnanna sem fundust í þvagsýni Þorsteins „beri merki skipulagðrar og vísvitandi notkunar bannaðra efna“.

Þá segir einni að „bæði fjöldi efna og eðli þeirra sýni fram á þekkingu á samverkandi áhrifum og viðleitni til að stjórna hormónakerfi líkamans“.

Notkunin er sögð markviss og úthugsuð, í þeim tilgangi að ná frm bættum árangri.

Þorsteinn var tekinn í lyfjapróf í ágúst síðastliðnum á Íslandsmótinu í criterium.

Greining A-sýnis skilaði afbrigðilegri niðurstöðu í flokki S1.2 - önnur anabólísk efni (Ligandrol, Ostarine og RAD104) og í flokki 4 - hormóna- og efnaskiptamiðlarar (Arimstane).

Viðurkenndi niðurstöðuna og heldur titlunum

Þorsteini var tilkynnt um niðurstöðuna undir lok september og var honum þá gefinn kostur á að útskýra niðurstöðurnar, en var um leið úrskurðaður í bráðabirgðarbann.

Tæpri viku eftir að honum var tilkynnt um niðurstöðurnar viðurkenndi hann niðurstöðu A-sýnisins og afsalaði sér um leið réttinum til greiningar á B-sýni.

Þorsteinn óskaði í kjölfarið eftir skriflegum úrskurði eftirlitsins með von um styttingu banns vegna játningar og skjótra svara.

Þorsteinn sagði enn fremur að hann hafi aðeins tekið efnin einu sinni, þann 19. ágúst, tveimur dögum fyrir áðurnefnda keppni.

Niðurstaða Lyfjaeftirlitsins er eftir sem áður sú að Þorsteinn er dæmdur í fimm ára keppnisbann, en hann heldur Íslandsmeistaratitli sínum úr götuhjólreiðum og bikarmeistaratitlinum úr tímatöku, þar sem bannið nær ekki til þess tíma.