Fiskur og rauð­vín í Barcelona í skugga sögu­sagna: „Best að segja sem minnst“

Komandi Evrópumót með Ís­landi er Janusi ofar­lega í huga en svo líður að því að hann þurfi að taka ákvörðun um framtíð sína því samningur hans við Pick Szeged er að renna sitt skeið.

„Ég er að verða samnings­laus næsta sumar og er auðvitað að skoða hvað væri best að gera fyrir mig og fjöl­skylduna í fram­haldinu. Bara fínt í þessum meiðslum að geta aðeins pásað þær hugsanir og sett ein­beitinguna á að komast aftur inn á völlinn. Nú er bara að fara spila og bara vonandi, fyrir stór­mót eða eftir stór­mót, þarf ég ein­hvern tímann að ákveða hvað ég geri í sumar.“

Janus hefur verið sterk­lega orðaður við stór­lið Barcelona og jafn­vel verið gengið svo langt að full­yrða að félags­skipti hans væru klár. Þá var Janus myndaður í Barcelona í síðasta mánuði og gaf það sögusögnum byr undir báða vængi.

Varstu bara að túristast í Barcelona?

„Já við fjölskuldan vorum í ferskum fisk og góðu rauðvíni. Það var þarna í lands­lið­spásunni, fínt að skipta aðeins um um­hverfi. Fá smá pásu and­lega.“

Þú hefur nú verið orðaður við liðið þar í borg. Er það eitt­hvað sem þú getur tjáð þig um?

„Ég held það sé bara best að segja sem minnst. Náttúru­lega alls konar hlutir í gangi, svo verður bara að koma í ljós hvernig þetta endar.“

Spenntur fyrir næsta stórmóti

Eins og fram kom í Sport­pakkanum í gær sneri Janus aftur inn á völlinn eftir meiðsli um síðastliðna helgi, fyrr en áætlað var, og mun ef ekkert bak­slag verður geta tekið fullan þátt í komandi Evrópumóti með Ís­landi í janúar. Stór­mótafiðringurinn er farinn að gera vart um sig hjá kappanum enda stutt í jóla­frí hjá honum.

„Ég er líka í þannig aðstöðu að ung­verska deildin fer í jóla­frí snemma, þann 10. desember á meðan að Þjóðverjarnir eru að spila milli jóla og nýárs, brjálað að gera og bullandi fókus. Hjá mér er bara orðið stutt í stór­mót. Það eru fjórir leikir aftur fram að hléi og tekur lands­liðið við næst. Ég er kominn í smá kitl í magann. Maður fer heim til Ís­lands um jólin með fjöl­skyldunni og planið er að halda áfram að æfa og vera í góðu formi ásamt því að hvíla sig. Mín vegna mættum við bara fara að undir­búa okkur fyrir EM strax 15. desember.“