Spenna í Dalnum fyrir nýjum Kana

Ármann situr á botni Bónus-deildarinnar, enn án stiga eftir langþráða endurkomu upp í efstu deild. 

Félagið lét Bandaríkjamanninn Dibaji Walker fara í síðasta mánuði, eftir fjóra leiki, og er hann kominn í lið ÍA.

Í hans stað hefur Ármann nú fengið bakvörðinn Vonterius Woolbright. Sá er 198 sentímetrar á hæð og 98 kg, og átti „sterkan feril“ í bandaríska háskólaboltanum eins og það er orðað í tilkynningu Ármanns.

Í tilkynningunni segir að Woolbright hafi leikið með Western Carolina University, þar sem hann var lykilleikmaður og valinn SoCon leikmaður ársins 2024. Á sínu síðasta tímabili í NCAA skoraði hann að meðaltali 21,1 stig, tók 12 fráköst og gaf 5 stoðsendingar á leik.

Eftir háskólaferilinn lék Woolbright í G-League og spilaði síðan í Evrópu. Ármann gerir sér miklar vonir um að hann styrki liðið bæði varnarlega og sóknarlega og verði lykilmaður í baráttunni sem framundan er. Hann komi með reynslu og hæfileika sem muni lyfta liðinu upp á næsta stig, eins og hafi sýnt sig strax á fyrstu dögum hans í Laugardalnum.

Eins og fyrr segir er Woolbright klár í slaginn gegn Þór annað kvöld.