Enginn blóðugur en einn brjálaður á HM í kvöld

Í fyrstu viðureigninni mættust Þjóðverjinn Ricardo Pietreczko og Portúgalinn José de Sousa. Pietreczko, sem jafnan vill láta tengja sig við Pokémon veruna Pikachu bar 3-1 sigur úr býtum í þeirri viðureign. Hann komst 2-0 yfir í settum áður en De Sousa minnkaði muninn í stöðuna 2-1. Pietreczko tók hins vegar fjórða settið og tryggði sér þar með sigur í næstu umferð. 

Þá hafði Danny Noppert, sjötti efsti maður heimslistans, betur gegn samlanda sínum frá Hollandi Jurjen van der Velde. Noppert vann fyrsta settið en Van Der Velde það annað en með því að taka sett þrjú og fjögur tryggi Noppert sér 3-1 sigur og farmiða í næstu umferð.

Fyrrverandi heimsmeistarinn frá árinu 2021, Gerwyn Price tók síðan öll settin gegn hinum tékkneska Adam Gawlas og vann 3-0 sigur. 

Í síðustu viðureign kvöldsins mættust Þjóðverjinn Niko Springer og Ástralinn Joe Comito. Springer talinn mun líklegri til afreka en það var hins vegar Joe Comito sem byrjaði betur og tók fyrsta settið. Springer sló frá sér í öðru setti en Ástralinn brotnaði ekki við það og svaraði með því að taka þriðja settið. 

Með sigri í fjórða settinu vissi Comito að sæti í næstu umferð yrði hans. Það sett var æsispennandi og fór alla leið í oddalegg. Þar fékk Springer tvö tækifæri til þess að kasta fyrir settinu og knýja fram framlengingu en brásts bogalistin í bæði skiptin. Svo fór að Comito tókst að klára fjórða settið og tryggja sig á ævintýralegan hátt áfram í 2.umferð.

Afar óvænt niðurstaða og auðsjáanlega var Springer brjálaður með niðurstöðuna og var fljótur að koma sér af sviðinu, honum til tekna barði hann ekki í borð og endaði blóðugur líkt og Skotinn Cameron Menzies í gær.

Keppni á HM heldur áfram á morgun þar sem annar fyrrverandi heimsmeistari, Raymond van Barneveld, mætir til leiks. Sýnt verður beint frá mótinu á Sýn Sport Viaplay rásinni og hefst útsendingin klukkan sjö.