Bróðir NFL-stjörnu stal bíl af NBA-stjörnu

Eldri bróðir Puka Nacua, stjörnu Los Angeles Rams í NFL-deildinni, var handtekinn um helgina fyrir að hafa stolið bíl nýliðans Adou Thiero, leikmanns NBA-liðsins Los Angeles Lakers.

Tveir menn, sem sagðir eru vera hinn 27 ára gamli Samson Nacua og hinn 27 ára gamli Trey Rose, voru að sögn handteknir fyrir að hafa tekið bílinn án leyfis.

Lögreglumenn voru kallaðir til á 1 Hotel í West Hollywood eftir að bíllinn var rakinn þangað. Tvímenningarnir höfðu að sögn lagt bílnum í bílastæðaþjónustu og farið inn á hótelið. Þeir voru handteknir eftir að lögreglumenn skoðuðu öryggismyndavélar og báru kennsl á þá.

Líkt og bróðir hans er Samson Nacua fyrrverandi fótboltamaður hjá BYU sem einnig var í háskóla í Utah. Á meðan Puka varð einn af bestu útherjum NFL-deildarinnar með Rams hefur Samson ekki spilað í NFL-deildinni.

Samson samdi við Indianapolis Colts eftir að hafa ekki verið valinn í nýliðavali NFL-deildarinnar árið 2022 en komst ekki í 53 manna hóp liðsins. Hann fékk annað tækifæri fyrir 2024-tímabilið með New Orleans Saints en komst aftur ekki í liðið. Atvinnumannaferill hans samanstendur af tímabilum með Pittsburgh Maulers í USFL-deildinni og Michigan Panthers í UFL-deildinni.

Á tíma sínum með Panthers var hann settur í eins leiks bann fyrir að slá stuðningsmann.

Svo vægt sé til orða tekið hefur vikan verið viðburðarík hjá Nacua-fjölskyldunni. Puka vakti mikla athygli þegar hann reyndi að koma Kick-streymurunum Adin Ross og N3on inn á æfingasvæði Rams á stuttri viku, en var reiðilega stöðvaður af aðalþjálfaranum Sean McVay. Síðan var hann gripinn við að streyma beint úr búningsklefanum eftir leik, gegn vilja liðsfélaga sinna.

Á þriðjudag fór Nacua í streymi hjá Ross og lét ummæli falla um dómara í NFL-deildinni sem munu örugglega kosta hann sekt frá deildinni. Hann lofaði einnig að framkvæma snertimarksdans með „gyðingatákni“ streymarans, sem spilar inn á gyðingahatur.

Hvað Thiero varðar, þá lék hann háskólabolta með Kentucky og Arkansas áður en hann var valinn 36. í nýliðavalinu af Brooklyn Nets og endaði hjá Lakers í skiptunum sem sendu Kevin Durant til Houston Rockets. Hann hefur spilað í níu leikjum fyrir Lakers, að meðaltali 5,8 mínútur í leik, og hefur skorað níu stig á ferlinum.