Eva Björk með stór­leik í fyrsta sigri Stjörnunnar

Stjarnan er áfram á botni deildarinnar en nú með þrjú stig, einu stigi á eftir Selfossi sem er í sætinu fyrir ofan. Fram, sem hafði unnið þrjá leiki í röð fyrir viðureign dagsins, er í 4. sætinu með ellefu stig.

Eva Björk Davíðsdóttir fór mikinn í leiknum í Mýrinni í dag, skoraði þrettán mörk og gaf átta stoðsendingar fyrir heimakonur. Natasja Hammer skoraði sex mörk, Inga María Reynisdóttir fimm og Hrafnhildur Anna Þorleifsdóttir varði sextán skot í marki Stjörnunnar (34 prósent).

Leikurinn var í járnum allan tímann. Stjarnan leiddi með einu marki í hálfleik, 14-13, og hélt forskotinu framan af seinni hálfleik. Fram sneri dæminu sér í vil um miðbik hans og komst nokkrum sinnum tveimur mörkum yfir.

Stjarnan breytti stöðunni úr 24-26 í 27-26 en Fram jafnaði í 27-27 og liðin héldust svo í hendur næstu mínútur.

Garðbæingar reyndust hins vegar sterkari á svellinu á lokamínútunum, skoruðu fimm af síðustu sjö mörkum leiksins og lönduðu sigri, 34-31.

Harpa María Friðgeirsdóttir og Ásdís Guðmundsdóttir skoruðu sex mörk hvor fyrir Fram og Valgerður Arnalds fimm.