Mo Salah tryggði Egyptum sigur annan leikinn í röð

Annan leikinn í röð skoraði Salah sigurmarkið og þjóðhetjan er heldur betur að standa undir nafni í byrjun mótsins.

Egyptar unnu 1-0 sigur á Suður-Afríku í dag þrátt fyrir að leika manni færri allan seinni hálfleikinn.

Sigurmark Salah kom úr vítaspyrnu á 45. mínútu en Salah fiskaði vítið sjálfur.

Á annarri mínútu í uppbótatíma fyrri hálfleiks fékk liðsfélagi hans, Mohamed Hany, sitt annað gula spjald og þar með rautt.

Manchester City-framherjinn Omar Marmoush var tekinn af velli í hálfleik til að þétta raðirnar í seinni hálfleiknum, tíu á móti ellefu.

Það tókst að halda út og niðurstaðan því 1-0 sigur og þar með fullt hús í efsta sæti riðilsins. Lokaleikurinn í riðlinum er á móti Angóla sem hefur aðeins eitt stig út úr fyrstu tveimur leikjum sínum.

Salah skoraði einnig sigurmarkið í 2-1 sigri á Simbabve í fyrsta leik en það mark hans kom ekki fyrr en í uppbótatíma leiksins.

Mo Salah er alls kominn með 65 mörk í 111 landsleikjum fyrir Egyptaland, þar af eru sex þeirra frá þessu ári. Hann vantar aðeins fjögur mörk til að jafna markamet Hossam Hassan (69 mörk frá 1985 til 2006).